തൊഴിലില്ലായ്മ പ്രതിസന്ധിക്ക് പരിഹാരം തേടി ചൈന

കേരള ന്യൂസ് മീഡിയ

തൊഴിലില്ലായ്മ പ്രതിസന്ധിക്ക് പരിഹാരം തേടി ചൈന; 12,200 സർവകലാശാല കോഴ്സുകൾ ഒഴിവാക്കി, എഐ വിഷയങ്ങൾക്ക് മുൻഗണന

റിപ്പോർട്ട്: കിരൺ എസ് പിള്ളൈ

യുവജന തൊഴിലില്ലായ്മയും തൊഴിൽ വിപണിയിലെ മാറ്റങ്ങളും നേരിടുന്നതിനായി ചൈനയിലെ സർവകലാശാലകൾ കഴിഞ്ഞ ഏതാനും വർഷങ്ങൾക്കിടെ 12,200 ബിരുദ കോഴ്സുകൾ ഒഴിവാക്കുകയോ നിർത്തിവയ്ക്കുകയോ ചെയ്തതായി റിപ്പോർട്ടുകൾ വ്യക്തമാക്കുന്നു. അതേസമയം, കൃത്രിമ ബുദ്ധി, റോബോട്ടിക്സ്, ഡാറ്റാ സയൻസ് തുടങ്ങിയ സാങ്കേതിക മേഖലകളിൽ 10,200 പുതിയ കോഴ്സുകൾ ആരംഭിക്കുകയും ചെയ്തു. രാജ്യത്തെ സർവകലാശാല കോഴ്സുകളുടെ 30 ശതമാനത്തിലേറെയെ ബാധിക്കുന്ന വലിയ മാറ്റമാണിതെന്ന് വിലയിരുത്തപ്പെടുന്നു. 

കല, മാനവികശാസ്ത്രം, വിദേശഭാഷകൾ, മാനേജ്മെന്റ് തുടങ്ങിയ മേഖലകളിലെ കോഴ്സുകളാണ് പ്രധാനമായും ഒഴിവാക്കപ്പെട്ടത്. തൊഴിൽ സാധ്യത കുറഞ്ഞ വിഷയങ്ങളിൽ നിന്ന് വ്യവസായ ആവശ്യങ്ങൾക്കനുസരിച്ചുള്ള കോഴ്സുകളിലേക്കാണ് ചൈനീസ് വിദ്യാഭ്യാസ സംവിധാനം ശ്രദ്ധ കേന്ദ്രീകരിക്കുന്നത്. 

എഐ സാങ്കേതികവിദ്യയുടെ വളർച്ചയോടെ വിവർത്തനം, ഫോട്ടോഗ്രഫി, ഡിസൈൻ തുടങ്ങിയ മേഖലകളിൽ വലിയ മാറ്റങ്ങൾ സംഭവിക്കുന്ന സാഹചര്യത്തിലാണ് ഈ നീക്കം. ചില സർവകലാശാലകൾ പരമ്പരാഗത കോഴ്സുകൾ അവസാനിപ്പിച്ച് എഐ അധിഷ്ഠിത പുതിയ കോഴ്സുകൾ ആരംഭിച്ചിട്ടുണ്ട്. 

എന്നാൽ ഈ മാറ്റങ്ങൾ തൊഴിലില്ലായ്മ പ്രശ്നത്തിന് സമ്പൂർണ പരിഹാരമാകുമോയെന്ന ചർച്ചയും ഉയരുന്നുണ്ട്. സാങ്കേതിക വിദ്യാഭ്യാസത്തിന് കൂടുതൽ പ്രാധാന്യം നൽകുമ്പോൾ മാനവികശാസ്ത്ര വിഷയങ്ങളുടെ പ്രാധാന്യം കുറയുമോയെന്ന ആശങ്കയും വിദ്യാഭ്യാസ വിദഗ്ധർ പങ്കുവയ്ക്കുന്നു. 

കേരള ന്യൂസ് മീഡിയ വാട്സ്ആപ്പ് ചാനൽ പിന്തുടരൂ: https://whatsapp.com/channel/0029Vb7Ks1v1t90adn8xFf2w

കേരള ന്യൂസ് മീഡിയ ഇ-പേപ്പർ: https://chat.whatsapp.com/E78Zp4LoHNTH8dsLXxgdO1?s=cl&p=a&mlu=3

കൂടുതൽ വാർത്തകൾ വായിക്കാൻ: www.keralanewsmediaonline.com