പാർലമെന്റിന്റെ ശീതകാല സമ്മേളനത്തിന് മുന്നോടിയായി നവംബർ 30 ന് സർവകക്ഷി യോഗം വിളിച്ച് കേന്ദ്രം

ഡൽഹി: പാർലമെന്റിന്റെ ശീതകാലസമ്മേളനത്തിന് മുന്നോടിയായി നവംബർ 30 ന് പാർലമെൻ്ററി കാര്യ മന്ത്രി കിരൺ റിജിജു സർവകക്ഷി യോഗം വിളിച്ചു.ബില്ലുകളുടെ പട്ടിക പ്രതിപക്ഷ നേതാവുമായി പങ്കിടുന്നതിനും അവരുടെ നിർദ്ദേശങ്ങൾ സ്വീകരിക്കുന്നതിനുമായി ഒരു സർവകക്ഷി യോഗം ചേരുമെന്ന് കേന്ദ്ര മന്ത്രി അർജുൻ റാം മേഘ്വാൾ നേരത്തെ എഎൻഐയോട് പറഞ്ഞിരുന്നു.വിവിധ വകുപ്പുകളുടെ സെക്രട്ടറിമാരുമായി ഞങ്ങൾ ഒരു കൂടിക്കാഴ്ച നടത്തും. പാസാക്കേണ്ട എല്ലാ ബില്ലുകളുടെയും സൂക്ഷ്മപരിശോധന നടത്തും.തുടർന്ന് ഒരു സർവകക്ഷി യോഗം ചേരും. അവിടെ ബില്ലുകളുടെ പട്ടിക പ്രതിപക്ഷ നേതാവുമായി പങ്കിടും. തുടർന്ന് പ്രതിപക്ഷ നേതാക്കളുടെ നിർദ്ദേശങ്ങൾക്കനുസരിച്ച് തന്ത്രങ്ങൾ രൂപീകരിക്കും,' മേഘ്വാൾ പറഞ്ഞു.ഡിസംബർ 1 മുതൽ ഡിസംബർ 19 വരെ ശീതകാല സമ്മേളനം നടക്കുമെന്ന് റിജിജു ഇതിനകം പ്രഖ്യാപിച്ചിട്ടുണ്ട്. ഈ തീയതികളിൽ സമ്മേളനം വിളിച്ചുകൂട്ടാനുള്ള സർക്കാരിന്റെ നിർദ്ദേശം പ്രസിഡന്റ് ദ്രൗപതി മുർമു അംഗീകരിച്ചതായി അദ്ദേഹം എക്‌സിൽ പറഞ്ഞു.19 ദിവസങ്ങളിലായി 15 സിറ്റിങ്ങുകൾ പാർലമെന്റ് നടത്തുമെന്ന് പ്രതീക്ഷിക്കുന്നു. ഡിസംബർ 5 നും 19 നും അംഗങ്ങളുടെ ബില്ലുകൾ പരിഗണിക്കും.