ശ്രീലങ്കക്കെതിരായ ടി20 പരമ്പര. ഇന്ത്യൻ വനിതാ ടീമിനെ പ്രഖ്യാപിച്ചു.ഹർമൻപ്രീത് ക്യാപ്റ്റൻ. സ്മൃതി മന്ദാന വൈസ് ക്യാപ്റ്റൻ

മുംബൈ: ശ്രീലങ്കക്കെതിരായ ടി20പരമ്പരക്കുള്ള ഇന്ത്യൻ വനിതാ ക്രിക്കറ്റ് ടീമിനെ പ്രഖ്യാപിച്ചു. ഏകദിന ലോകകപ്പിൽ ജേതാക്കളായ ഇന്ത്യൻ ടീമിലെ ഭൂരിഭാഗം താരങ്ങളും ശ്രീലങ്കക്കെതിരായ ടി20 പരമ്പരക്കുള്ള ടീമിലും ഇടം നേടി.ഹർമൻപ്രീത് കൗർ തന്നെയാണ് ടീമിനെ നയിക്കുന്നത്. മലയാളി താരങ്ങളാരും ടീമിലിടം നേടിയില്ല. ഏകദിന ലോകകപ്പ് ജേതാക്കളായശേഷം ഇന്ത്യൻ ടീം കളിക്കുന്ന ആദ്യ പരമ്പരയാണിത്.ഏകദിന ലോകകപ്പിൽ ഇന്ത്യയുടെ ടോപ് സ്കോററായ സ്‌മൃതി മന്ദാന തന്നെയാണ് വൈസ് ക്യാപ്റ്റൻ. സംഗീത സംവിധായകൻ പലാഷ് മുച്ചലുമായുള്ള വിവാഹം റദ്ദാക്കിയശേഷം സ്മൃതി കളിക്കാനിറങ്ങുന്ന ആദ്യ പരമ്പര കൂടിയാണിത്.21ന് വിശാഖപട്ടണത്താണ് അഞ്ച് മത്സര ടി20 പരമ്പരയിലെ ആദ്യ മത്സരം. രണ്ടാം മത്സരവും ഇതേവേദിയിൽ നടക്കും.തിരുവനന്തപുരം ഗ്രീൻഫീൽഡ് സ്റ്റേഡിയത്തിലാണ് പരമ്പരയിലെ അവസാന മൂന്ന് മത്സരങ്ങൾ.ഡിസംബർ 26, 28, 30 തീയതികളിലാണ് തിരുവനന്തപുരത്തെ മത്സരങ്ങൾ.ടി20 പരമ്പരക്കുശേഷം ശ്രീലങ്കക്കെതിരെ ഇന്ത്യ മൂന്ന് മത്സരങ്ങളടങ്ങിയ ഏകദിന പരമ്പരയിലും കളിക്കും.