കർണാടകയിൽ ശബരിമല തീർത്ഥാടകർ സഞ്ചരിച്ച കാർ മേൽപ്പാലത്തിൽ നിന്ന് താഴേക്കു പതിച്ച് നാല് പേർ മരിച്ചു

ബംഗളൂരു; ശബരിമല തീർത്ഥാടകർ സഞ്ചരിച്ച അമിതവേഗതയിലായിരുന്ന കാർ മേൽപ്പാലത്തിൻ്റെ കൈവരിയിൽ ഇടിച്ച് താഴെയുള്ള അടിപ്പാതയിലേക്ക് വീണ് നാല് പേർ മരിച്ചു.കർണാടകയിലെ കോലാർ ജില്ലയിൽ തിങ്കളാഴ്ച പുലർച്ചെയാണ് അപകടം നടന്നതെന്ന് പോലീസ് അറിയിച്ചു. മാലൂർ താലൂക്കിലെ അബ്ബേനഹള്ളി ഗ്രാമത്തിൽ പുലർച്ചെ 2.15 നും 2.30 നും ഇടയിലാണ് അപകടം സംഭവിച്ചത്.

സുഹൃത്തുക്കളായിരുന്ന മരിച്ച നാല് പേരും ശബരിമലയിലേക്ക് പോവുകയായിരുന്നു. അമിത വേഗതയിലായിരുന്ന കാർ മേൽപ്പാലത്തിന്റെ വശത്തെ കൈവരിയിൽ ഇടിക്കുകയായിരുന്നുവെന്ന് പ്രാഥമിക അന്വേഷണത്തെ ഉദ്ധരിച്ച് മുതിർന്ന പോലീസ് ഉദ്യോഗസ്ഥൻ പറഞ്ഞു.ഇടിയുടെ ആഘാതം വളരെ ശക്തമായതിനാൽ വാഹനവും അതിലുണ്ടായിരുന്ന നാല് പേരും ഏകദേശം 100 മീറ്ററോളം താഴ്ചയിലേക്ക് വീഴുകയും സംഭവസ്ഥലത്ത് വെച്ച് തന്നെ മരിക്കുകയും ചെയ്തു.