ബലൂചിസ്ഥാനിൽ 24 മണിക്കൂറിനുള്ളിൽ 7 സ്ഫോടനങ്ങൾ; പാകിസ്ഥാൻ ജാഗ്രതയിൽ

ക്വെറ്റ: ബലൂചിസ്ഥാൻ പ്രവിശ്യയിൽ24 മണിക്കൂറിനുള്ളിൽ ഏഴ് സ്ഫോടനങ്ങൾ ഉണ്ടായതിനെത്തുടർന്ന് പാകിസ്ഥാനിൽ പരിഭ്രാന്തി. സ്ഫോടനങ്ങളിൽ ആരും കൊല്ലപ്പെട്ടില്ലെങ്കിലും, ഒരു നിർമ്മാണ കമ്പനിയുടെ രണ്ട് സുരക്ഷാ ജീവനക്കാർക്ക് പരിക്കേറ്റതായി ഉദ്യോഗസ്ഥർ പറഞ്ഞു, ക്വറ്റയിലും ദേര മുറാദ് ജമാലിയിലുമാണ് സ്ഫോടനങ്ങൾ നടന്നത്.ക്വറ്റയിലാണ് ആദ്യ സ്ഫോടനം നടന്നതെന്ന് ഉദ്യോഗസ്ഥർ പറഞ്ഞു. അവിടെ ചില കലാപകാരികൾ പോലീസ് ചെക്ക് പോയിന്റിന് നേരെ ഗ്രനേഡ് എറിഞ്ഞു. രണ്ടാമത്തെ സ്ഫോടനം ക്വറ്റയിൽ ഒരു തീവ്രവാദ വിരുദ്ധ വകുപ്പിന്റെ വാഹനത്തിന് സമീപം ഒരു ഐഇഡി സ്ഫോടനമായിരുന്നു.പിന്നീട്, വൈകുന്നേരം ബലൂചിസ്ഥാൻ തലസ്ഥാനത്ത് മൂന്ന് സ്ഫോടനങ്ങൾ കൂടി കേട്ടു. ക്വറ്റയുടെ പ്രാന്തപ്രദേശത്തുള്ള ലോഹർ കരേസിനടുത്താണ് സ്ഫോടനം നടന്നതെന്ന് സീനിയർ പോലീസ് സൂപ്രണ്ട് ആസിഫ് ഖാൻ പറഞ്ഞു, ക്വറ്റയെ പാകിസ്ഥാന്റെ മറ്റ് ഭാഗങ്ങളുമായി ബന്ധിപ്പിക്കുന്നപ്രധാന പാതയ്ക്ക് കേടുപാടുകൾ സംഭവിച്ചു.

ക്വെറ്റ സ്റ്റേഷന് സമീപമുള്ള ഒരു റെയിൽവേ ട്രാക്കിൽ ചില കലാപകാരികൾ ഒരു സ്ഫോടനം നടത്തിയതായും ഇത് മേഖലയിലെ റെയിൽവേ ഗതാഗതം നിർത്തിവച്ചതായും ഖാൻ പറഞ്ഞു. ദേര മുറാദ് ജമാലിയിൽ ചില കലാപകാരികൾ ഗ്രനേഡ് എറിഞ്ഞതിന് ശേഷം ഒരു പോലീസ് വാഹനത്തിന് നേരെയും ആക്രമണം ഉണ്ടായി.ക്വെറ്റയിലെ സരിയാബ് റോഡിലുള്ള ഒരു നിർമ്മാണ കമ്പനി സ്ഥലത്തേക്ക് കലാപകാരികൾ ഹാൻഡ് ഗ്രനേഡുകൾ എറിഞ്ഞു, രണ്ട് സുരക്ഷാ ജീവനക്കാർക്ക് പരിക്കേറ്റു. ക്വെറ്റയിലെ മൻസൂർ ഷഹീദ് പോലീസ് സ്റ്റേഷന് നേരെ ഗ്രനേഡുകൾ എറിഞ്ഞുകൊണ്ട് ഞായറാഴ്‌ചയും അവർ ആക്രമണം തുടർന്നു. ക്വെറ്റയിലെ കെച്ച് ബെഗ് പ്രദേശത്തെ മറ്റൊരു പോലീസ് പോസ്റ്റും അവർ ഗ്രനേഡുകൾ ഉപയോഗിച്ച് ആക്രമിച്ചു.ആക്രമണങ്ങൾ ബലൂചിസ്ഥാനിൽ പരിഭ്രാന്തി പരത്തിയിട്ടുണ്ടെങ്കിലും ഇതുവരെ ഒരു സംഘടനയും ഉത്തരവാദിത്തം ഏറ്റെടുത്തിട്ടില്ലെന്ന് പാകിസ്ഥാൻ ഉദ്യോഗസ്ഥർ പറഞ്ഞു.