ചെങ്കോട്ടയിലേത് ചാവേറാക്രമണമെന്ന് സ്ഥിരീകരണം 

*ചെങ്കോട്ടയിലേത് ചാവേറാക്രമണമെന്ന് സ്ഥിരീകരണം; കാർ ഓടിച്ചത് ഡോ. ഉമർ മുഹമ്മദ്, അറസ്റ്റിലായ ഭീകരസംഘത്തിലെ കണ്ണി* 

 *ന്യൂഡൽഹി* : ഡൽഹിയിലെ ചെങ്കോട്ടക്ക് സമീപം തിങ്കളാഴ്ച വൈകുന്നേരം നടന്ന സ്‌ഫോടനവുമായി ബന്ധപ്പെട്ട് കൂടുതൽ നിർണായക വിവരങ്ങൾ അന്വേഷണ ഉദ്യോഗസ്ഥർ പുറത്തുവിടുന്നു. സ്‌ഫോടനം നടത്തിയത് ഒരു ചാവേർ ആക്രമണമായിരുന്നു എന്നും, കാർ ഓടിച്ചിരുന്ന ഡോക്ടർ ഉമർ മുഹമ്മദ് എന്നയാളാണ് മുഖ്യസൂത്രധാരനെന്നുമാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. ജമ്മു-കശ്മീർ, ഹരിയാണ പോലീസ് അടുത്തിടെ വൻതോതിൽ സ്‌ഫോടകവസ്തുക്കളുമായി അറസ്റ്റ് ചെയ്ത ഭീകരസംഘത്തിലെ ഒരു കണ്ണിയാണ് ഇയാളെന്നും അന്വേഷണോദ്യോഗസ്ഥർ സ്ഥിരീകരിക്കുന്നു. സ്‌ഫോടനത്തിൽ കാറോടിച്ചിരുന്ന ഉമർ മുഹമ്മദ് കൊല്ലപ്പെട്ടതായാണ് നിഗമനം.

ചെങ്കോട്ട മെട്രോ സ്റ്റേഷനിലെ ഒന്നാം നമ്പർ ഗേറ്റിന് സമീപം പഴയ ഡൽഹിയിലാണ് ഹ്യൂണ്ടായ് ഐ20 കാർ പൊട്ടിത്തെറിച്ചത്. തിങ്കളാഴ്ച വൈകിട്ട് 6:52-നാണ് സ്‌ഫോടനം നടന്നത്. ഇതിന് മുമ്പ് ഏകദേശം മൂന്ന് മണിക്കൂറോളം കാർ പാർക്ക് ചെയ്തിരുന്നതായി സിസിടിവി ദൃശ്യങ്ങളിൽ വ്യക്തമാണ്. ഈ ദാരുണമായ സംഭവത്തിൽ ഒമ്പത് പേർ മരിക്കുകയും ഇരുപതോളം പേർക്ക് പരിക്കേൽക്കുകയും ചെയ്തിരുന്നു.

ഫരീദാബാദ് ഭീകരസംഘത്തിലെ പ്രധാനിയായ ഡോ. മുസമ്മിൽ ഷക്കീൽ അറസ്റ്റിലായതിന് പിന്നാലെ ഉമർ മുഹമ്മദ് പരിഭ്രാന്തനായി എന്നും, ഇതാണ് പെട്ടെന്നുള്ള സ്‌ഫോടനത്തിന് കാരണമായതെന്നുമാണ് അന്വേഷണ ഏജൻസികൾ നൽകുന്ന സൂചന.

ജമ്മു കശ്മീരിലെ പുൽവാമ സ്വദേശിയായ താരിഖിൽനിന്നാണ് കാർ വാങ്ങിയതെന്നും, ഇയാളെ ചോദ്യം ചെയ്യാനായി കസ്റ്റഡിയിലെടുത്തതായും റിപ്പോർട്ടുകൾ പറയുന്നു.

ജനത്തിരക്കേറിയ സ്ഥലത്തേക്ക് കാർ ഓടിച്ചുകയറ്റുന്നതിന് മുമ്പ് തന്നെ സ്‌ഫോടകവസ്തുക്കൾ കാറിൽ സ്ഥാപിച്ചിരുന്നു. തുടർന്നുണ്ടായ പൊട്ടിത്തെറി സമീപത്തെ വാഹനങ്ങളിലേക്കും തീ പടരാൻ കാരണമായി. സംഭവത്തിൽ യുഎപിഎ അടക്കമുള്ള കടുത്ത വകുപ്പുകൾ ചുമത്തി പോലീസ് കേസെടുത്തിട്ടുണ്ട്.