ആൺസുഹൃത്തുമായി സംസാരിച്ചതിന് പരസ്യമായി അപമാനിച്ചു; കണ്ണൂരിൽ യുവതിയുടെ ആത്മഹത്യയിൽ മൂന്ന് പേർ അറസ്റ്റിൽ

കണ്ണൂർ: കണ്ണൂരിലെ കായലോട്ടിൽ യുവതി ആത്മഹത്യ ചെയ്ത സംഭവത്തിൽ മൂന്ന് പേർ അറസ്റ്റിൽ.കായലോട് പറമ്പായിലെ റസീനയുടെ മരണത്തിലാണ് പറമ്പായി സ്വദേശികളായ വി.സി.മുബഷിർ, കെ.എ.ഫൈസൽ, വി.കെ.റഫ്നാസ് എന്നിവരെ അറസ്റ്റ് ചെയ്തത്.

ഞായറാഴ്ച റസീന ആൺ സുഹൃത്തുമായി സംസാരിച്ചതിനെ ഒരു സംഘം ചോദ്യം ചെയ്തിരുന്നു.

കാറിൽ സുഹൃത്തുമായി സംസാരിക്കുന്നത് കണ്ട പ്രതികളും കണ്ടാലറിയുന്ന ചിലരും ചോദ്യം ചെയ്യുകയും കൂടുതൽ ആളുകളെ വിളിച്ചുവരുത്തി അപമാനിച്ചെന്നും റസീനയുടെ ആത്മഹത്യാക്കുറിപ്പിൽ പറയുന്നുണ്ട്.റസീനയുടെ മാതാപിതാക്കളെയും അങ്ങോട്ട് വിളിച്ചുവരുത്തുകയും ചെയ്തു.

ഇതിന് പിന്നാലെ മയ്യിൽ സ്വദേശിയായ ആൺ സുഹൃത്തിനെ സമീപത്തെ മൈതാനത്തിലെത്തിച്ച് മരത്തിൽ കെട്ടിയിട്ട് ക്രൂരമായി മർദിച്ചു.

ഇയാളുടെ കൈയിലുണ്ടായിരുന്ന മൊബൈൽ ഫോണും ടാബും പ്രതികൾ കൈക്കലാക്കുകയും ചെയ്തു.

പിന്നാലെയാണ് റസീനയെ മരിച്ച നിലയിൽ കണ്ടെത്തിയത്. ആത്മഹത്യാകുറിപ്പിലെ വിവരങ്ങളുടെ അടിസ്ഥാനത്തിലാണ് പിണറായി പൊലീസ് പ്രതികളെ അറസ്റ്റ് ചെയ്തത്.