അരുണാചലിൽ തൊഴിലാളികളുമായി പോയ ട്രക്ക് കൊക്കയിലേക്ക് മറിഞ്ഞ് 22 മരണം. 17 മൃതദേഹങ്ങൾ കണ്ടെത്തി. അപകട വിവരം പുറംലോകമറിഞ്ഞത് രക്ഷപെട്ടയാൾ മലകയറി തിരികെയെത്തിയപ്പോൾ. രക്ഷാ പ്രവർത്തനം പുരോഗമിക്കുന്നു

ഡൽഹി: അരുണാചൽ പ്രദേശിൽ വാഹനാപകടത്തിൽ 22 തൊഴിലാളികൾ മരിച്ചതായി റിപ്പോർട്ട്. ഇന്തോ-ചൈന അതിർത്തിയിലെ ഹയൂലിയാങ്-ചഗ്ലഗാം റോഡിലാണ് വാഹനാപകടമുണ്ടായത്. 17 പേരുടെ മൃതദേഹം കണ്ടെത്തി.ചൊവ്വാഴ്ചയാണ് അപകടം നടന്നത്. മലയോരമേഖല ആയതിനാൽ തന്നെ അപകടം നടന്ന വിവരം ആളുകളിൽ ആദ്യഘട്ടത്തിൽ അറിഞ്ഞിരുന്നില്ല. അപകടത്തിൽ രക്ഷപ്പെട്ടയാൾ മലകയറി തിരികെയെത്തിയതോടെയാണ് അപകടവിവരം പുറംലോകമറിഞ്ഞത്.നിലവിൽ രക്ഷാ പ്രവർത്തനം പുരോഗമിക്കുകയാണ്. സംസ്ഥാന ദുരന്തനിവാരണ സേനയുടെയും ദുരന്ത നിവാരണസേനയുടെയും നേതൃത്വത്തിൽ ആണ്.രക്ഷാപ്രവർത്തനം പുരോഗമിച്ചുകൊണ്ടിരിക്കുന്നത്.

അസമിലെ ടിൻസുകിയ ജില്ലയിലെ ഗെലാപുഖുരി ടീ എസ്റ്റേറ്റിൽ നിന്ന് കരാർ ജോലിക്കായി അരുണാചൽ പ്രദേശിലേക്ക് പോവുകയായിരുന്നു തൊഴിലാളികൾ. ഇതുവരെ, 17 മൃതദേഹങ്ങൾ സ്ഥലത്ത് നിന്ന് അധികൃതർ കണ്ടെടുത്തിട്ടുണ്ട്, ബാക്കിയുള്ളവരെ കണ്ടെത്താനുള്ള ശ്രമങ്ങൾ തിരച്ചിൽ സംഘങ്ങൾ തുടരുകയാണ്.പ്രാദേശിക പോലീസും ജില്ലാ ഭരണകൂടവും അടിയന്തര പ്രതികരണ സേനയും പ്രവർത്തനങ്ങൾ ഏകോപിപ്പിക്കുന്നുണ്ടെങ്കിലും, പരുക്കൻ ഭൂമിശാസ്ത്രവും കുത്തനെയുള്ള ചരിവുകളും രക്ഷാപ്രവർത്തനങ്ങൾക്ക് തടസ്സമാകുന്നുണ്ടെന്ന് ഉദ്യോഗസ്ഥർ പറയുന്നു.

കണ്ടെടുത്ത മൃതദേഹങ്ങൾ പോസ്റ്റ്മോർട്ടം പരിശോധനയ്ക്ക് അയച്ചിട്ടുണ്ട്, മരിച്ചവരുടെ കുടുംബങ്ങളെ വിവരം അറിയിച്ചിട്ടുണ്ട്.